काठमाडौँ । गायक सविन गौतमको दोहोरी गीत ‘चुन्नी तानम की’ औपचारिक रूपमा सार्वजनिक गरिएको छ।
शुक्रबार काठमाडौँमा आयोजित कार्यक्रममा राष्ट्रिय लोक तथा दोहोरी गीत प्रतिष्ठान नेपालकी अध्यक्ष रीता थापा मगरको प्रमुख आतिथ्यतामा गीत सार्वजनिक गरिएको हो। कार्यक्रमको आयोजना राष्ट्रिय लोकसञ्चारकर्मी नेपालले गरेको हो।
गीतमा शिव हमालको शब्द र प्रदिप अधिकारीको संगीत रहेको छ। यसमा सविन गौतम र दिपिका बयम्बु मगरको स्वर समावेश छ। निर्देशक दिपेन्द्र तिमिल्सीनाको निर्देशनमा बनेको भिडियोमा पुष्प खड्का, रजनी गुरुङलगायत कलाकार फिचर्ड छन्।
मौलिक शैलीमा बनेको गीतलाई प्रदिप अधिकारीको युट्युब च्यानलमार्फत सार्वजनिक गरिएको हो। गीत अनुरुप भिडियोमा पनि मौलिकता कायम गरिएको छ।
कार्यक्रममा अध्यक्ष रीता थापा मगरले मौलिक गीत–संगीतलाई प्राथमिकतामा राख्न कलाकारहरूलाई आग्रह गर्दै भनिन्, “मौलिक गीत गाएर, नाचेर पनि जीवन यापन सम्भव छ। विकृति र अव्यवस्थाको प्रवृत्ति अब दोहोरिने छैन भन्ने विश्वास लिन्छु।” उनले गीतलाई सफलताको शुभकामना समेत दिइन्।
राष्ट्रिय लोकसञ्चारकर्मी नेपालका अध्यक्ष चन्द्रमणि गौतमले ‘चुन्नी तानम की’ले नवआगन्तुक कलाकार तथा सर्जकलाई पनि प्रेरणा दिने बताए।
गीत सार्वजनिक कार्यक्रममा सर्जक शिव हमाल, एरेन्जर विनोद बाजुराली, निर्देशक दिपेन्द्र तिमिल्सीना र मोडल रजनी गुरुङले गीत तथा भिडियोसँग सम्बन्धित अनुभव बाँडे थिए ।
भिडियो :