काठमाडौँ । गायक छविराज सुनारको गीत ‘पोखरा पृथ्वी चोकैमा’ करोड क्लब पुगेको खुशीमा काठमाडौँमा विशेष कार्यक्रम आयोजना गरी केक काटेर सेलिब्रेसन गरिएको छ।
शुक्रबार सम्पन्न कार्यक्रम राष्ट्रिय लोक तथा दोहोरी गीत प्रतिष्ठान नेपालकी अध्यक्ष रीता थापा मगरको प्रमुख आतिथ्यतामा सम्पन्न भएको थियो। कार्यक्रममा सहभागी कलाकारले गीतले प्राप्त गरेको सफलता एक–आपसमा साटासाट गर्दै केक काटेर खुसी मनाएका थिए।
नेत्र अर्यालको शब्द, नन्दु परियारको संगीत र छविराज सुनारको स्वरमा तयार गीतमा महिला स्वरमा शान्ता रानी परियारले साथ दिएकी छन्। गीतले युट्युबमा एक करोड २० लाखभन्दा बढी भ्यु प्राप्त गरिसकेको छ।
अध्यक्ष थापा मगरले गीत व्यावसायिक रूपमा सफल हुनु कलाकारिताको निरन्तरताको सूचक भएको बताइन्। उनले विकृति र अव्यवस्थाविरुद्ध कहिलेकाहीं साइबर ब्यूरोसम्म धाउनु पर्ने तीतो अनुभव पनि सुनाइन्। “सञ्चारकर्मीहरू मौलिक सृजनाको पक्षमा लेख्न–बोल्न थाल्नु भएको छ, यो लोकगीत–संगीतका लागि खुसीको विषय हो,” उनले भनिन्।
कार्यक्रममा गायिका शान्ता रानी परियारले गीत गाएर सेलिब्रेसनको माहोल झनै रमाइलो बनाएकी थिइन्।
प्रतिष्ठानका महासचिव शिव हमालले गीत सफल हुँदा सबै कलाकर्मीको जीवनयापन सहज हुने उल्लेख गर्दै भने, “हामी यस्तो पेशामा छौँ—लाख खर्चेर हजार कमाउँदा पनि खुसी हुनुपर्छ।”
राष्ट्रिय लोकसञ्चारकर्मी नेपालका अध्यक्ष चन्द्रमणि गौतमले गीतलाई प्रशंसा गर्दै मौलिक सृजनामा सर्जकको ध्यान आवश्यक रहेको बताए। सर्जक नेत्र अर्यालले आफ्नो सृजना करोड क्लब पुगेकोमा खुशी व्यक्त गरे।
कार्यक्रममा गीतसँग जोडिएका सर्जक तथा कलाकारलाई मायाको चिनो प्रदान गरिएको थियो।
त्यसैगरी व्यवसायी पृथ्वी थकाली, मोडल सागर लम्साल ‘बले’, जुना विश्वकर्मा, संगीतकार नन्दु परियार, एरेन्जर एचबिएन किस्मत, गायक सुनारको परिवारलगायतको उपस्थिति रहेको थियो ।
भिडियो :