काठमाडौं । ‘हामी नेपाल’ संस्थाका संयोजक सुदन गुरुङ बारास्थित पूर्वमन्त्री किसान श्रेष्ठको घर पुगेर स्थानीय युवालाई नधम्काउन आग्रह गरेका छन्।
पीडित स्थानीय युवालाई साथमा लिएर उनी शनिबार किसान श्रेष्ठको औराहास्थित घर पुगेका थिए । भेटका क्रममा श्रेष्ठ घरमा नरहेपनि गुरुङले घरमै रहेका व्यक्तिबाट आफ्नो सन्देश श्रेष्ठसम्म पुर्याइदिन अनुरोध गरेको बताए ।
घरबाट बाहिरिएपछि सुदनले भने,
‘बारम्बार आएर थर्काउने, जेनजीहरुलाई यातना दिने, मानसिक रुपमा दबाब सिर्जना गर्ने गरेको रहेछ । त्यसैले उहाँलाई यस्तो नगर्नुहोस् भन्ने आग्रह गरेर घरमा रहेका म्यासेन्जरमार्फत सन्देश पठाएको हुँ,’ उनले भने। किसान श्रेष्ठसँग भने भेट हुन नसकेको उनले जनाए ।
गुरुङका अनुसार आफू बारामा गएर स्थानीय युवासँगको द्वन्द्वको वातावरण नबनोस् भन्ने उद्देश्यले वार्ता गर्न पुगेका थिए।
‘द्वन्द्वको वातावरण नबनोस्, भाइको सुरक्षाका लागि नै हामी वार्ता गर्न गएका थियौँ,’ सुदनले जोड दिए।
उनसँगै रहेका एक युवकले आफू प्रहरीकै अगाडि कुटिएको दाबी गर्दै सुरक्षा नपाएको गुनासो गरे।
‘पुलिसकै अगाडि चार–पाँच जनाले पिट्यो। अहिले म सुरक्षित महसुस गरिरहेको छैन। प्रहरी प्रशासनमै विश्वास छैन,’ उनले भने। कुटपिटमा संलग्न को–को थिए भन्ने उनले खुलाएनन्।