काठमाडौं । सञ्चार तथा सूचना प्रविधिमन्त्री जगदीश खरेलले सामाजिक सञ्जाललाई बन्द नगरी व्यवस्थित र जिम्मेवार बनाउनेतर्फ सरकार केन्द्रित रहेको बताएका छन्। उनले डिजिटल मिडियालाई नयाँ मूलधारको मिडियाको रूपमा सरकारले स्वीकार गरिसकेको समेत स्पष्ट पारेका छन् ।
बुधबार सिंहदरबारस्थित सञ्चार मन्त्रालयमा लोक सञ्चारकर्मी नेपाल र अनलाइन टिभी पत्रकार संघसँगको संयुक्त छलफलमा मन्त्री खरेलले भने, “सामाजिक सञ्जाल कहिल्यै बन्द हुनुहुँदैन र बन्द गरिँदैन। नयाँ मूलधारको मिडियाको रूपमा रहेका सामाजिक सञ्जालहरूलाई सरकारले स्वीकार गरिसकेको छ। सरकार जनताको आवाज सुन्ने, देखिने र महसुस हुने हुनुपर्छ।”
उनका अनुसार सञ्चार मन्त्रालय त्यस दिशामा क्रियाशील छ र मन्त्रालय ‘सुनिन्छ पनि, देखिन्छ पनि र महसुस हुन्छ पनि’ भन्ने धारणा बोकेको छ।
मन्त्री खरेलले अनलाइन मिडिया दर्ता प्रक्रियामा देखिएका झन्झटहरू हटाउनेतर्फ पनि पहल भइरहेको जानकारी दिए। उनका अनुसार, दर्ता र नवीकरणसम्बन्धी अनावश्यक प्रशासनिक प्रक्रियालाई सहज बनाउन मन्त्रिपरिषद्बाटै निर्णय गर्ने तयारी भइरहेको छ।
कार्यक्रममा लोक सञ्चारकर्मी नेपालका अध्यक्ष चन्द्रमणि गौतम र अनलाइन टिभी पत्रकार संघका अध्यक्ष जीवन भण्डारीले सञ्चारकर्मीको समस्या, अनलाइन मिडियाको अवस्था र सुधारका सुझावसहित मन्त्री खरेलको ध्यानाकर्षण गराएका थिए।
छलफलपछि दुवै संस्थाले मन्त्री खरेललाई ध्यानाकर्षण पत्र बुझाएका थिए। मन्त्री खरेलले उक्त पत्र अध्ययन गरी सञ्चारकर्मीको हितका लागि समन्वयपूर्वक काम गर्ने प्रतिबद्धता व्यक्त गरे ।